Xuan Santori presenta en Villaviciosa'l llibru '42.553: Depués de Buchenwald'

L'escritor Xuan Santori va presentar esti xueves, 25 d'ochobre, a les 19:00 hores na sala d'audiovisuales de la Casa de los Hevia de Villaviciosa, la so obra '42.553: Depués de Buchenwald', col qu'algamó'l XXIII premiu Máximo Fuertes Acevedo d'ensayu que concede la Conseyería de Cultura del Principáu d'Asturies.

En '42.553: Depués de Buchenwald', Santori recueye'l testimoniu vital de Vicente García Riestra (La Pola Siero, 1925), esiliáu republicanu deteníu en Francia y deportáu pola Gestapo al campu de concentración de Buchenwald, na contorna de la ciudá de Weimar, onde se llevaba a la muerte a les persones internaes al traviés del trabayu esclavu pa la industria de guerra nazi.
Xuan Santori (Uviéu, 1968) ye doctor en filoloxía, ye una de les voces más destacaes na lliteratura asturiana contemporánea, con poemarios como 'Los inconvenientes de la especie' (Premiu Teodoro Cuesta 1999) o 'Bis a bis', y obres de narrativa breve como 'La heredá' o 'La fábrica de lluz'. Ye tamién estudiosu de la lliteratura asturiana del surdimientu, a la que dedicó la so tesis doctoral.
L'actu ta entamáu en xunto polos talleres de llectura n'asturianu de la Comarca de la Sidra y l'Aula d'Asturianu del Atenéu Obreru de Villaviciosa.